أنا من الشخصيات إلي بتركب تكاسي كتير وبسمع مزيكا كتير وبتقرا كتب مختلفه كتير وبتحب تجرب مطاعم وتطبخ اكلات مختلفه واختراعات كتير ... وبحب يكون عندي هدوم كتير واقلام أكتب بيها كتير ... في حاجات في حياتي كده بالصلاة علي النبي بحب انها تكون كتير في كتير بقي لامؤخذه يعني .
يعني مثلا بحب اعيش في كركبه ... أحب ان يكون حوالين مني كراكيب كتيره كده ...
أحب أول ما أصحي من النوم أشرب فنجان نسكافيه ....مع كريمر بدون سكر وبعدين أبقي أفكر في الفطار مثلا ....
بحب اقرأ الكتب .... لكن ماليش أي تقل علي المجلات او الجرايد ... مع إني وانا صغيره في سن المراهقة كده كنت مدمنة جرنان الحوادث أيام ما كان بيتباع ب 50 قررررررش نص مصروفي وقتها وبينزل كل يوم خميس وكان الجرنان دا ممنوع دخوله البيت اصلا اساساً ... إية السبب والله معرفش الحجة ما قلتش لي السبب قبل ما تموت ...
وزاي ما وضحت قبل كده مليون مره إن بيستفزني الغباء ... والغباء درجات و إنت ممكن تصادف الاغبية في كل مكان ... في مواصله في تاكسي في الشارع في البيت وأحيانيا في الحلم زاي حلاتي مثلا ... من كتر ما بقابل ناس اغبية ودا ما يمنعش ساعات بكون غبية وبتصرف بغشامة وغباء لكن الي يضحكك بقي إن وانا بحلم الاقي نفسي بحلم بواحد او واحده غبية عايزه توصل لعنوان معين ومش عارفه ... وافضل طول ام الحلم الغتيت دا اشرح لها فين العنوان او اشرح له وهو جموسة متنكره في جسد إنسان طبعا صحيت من النوم دمي بيفور بس الفوران دا راح لما بوس بوس حبيبتي قلبي بوسي صحبتي اتصلت تعزمني علي خطوبتها يوم الجمعة القادمة ربنا يا رب يتمم ليكي بخير يا بوسي يا رب موااااااه يا روح قلبي .... متخفوش يا جدعان هوافيكم بالاخبار ان شاء الله ... نرجع بقي لقصتنا .
إنت ممكن تلاقي نفسك نازل من بيتكم ومسعجل جدا لان عندك كورس وبين بيتك وبين الكورس دا مشوار تقوم انت تركب تاكسي عشان توصل وإذ من حظك الهباب تركب مع تاكسي غبي مش فاهم حاجة ومش عارف الطريق فين وما بين ان دمك بيفور منه وبيغلي و الضحك من غباءه متعلق ومشنوق ... يعني مثلا السواق دا واحنا في الاشارة كل العربيات الي حوالين منه تكاسي وميكرو باص ويروح قايل للتاكسي الي قصادة هو عشان انت ملاكي تركن في نص الطريق ... أعدت اقوله دي إشارة حضرتك ؟؟ يقولي فين دي؟ انا مقدرتش امسك نفسي ... بعدين بقوله عايزه عند سراج مول يقولي ايوة ايوة عارفه الي اتحرق ... بقوله ايه الي تحرق انا عايزه حضرتك السراج مول يقولي عارفه وربنا الي البلطجية حروق اقوله الي في مدينة نصر !!! يقولي إيه دا ؟؟؟ هما نقوله امتي؟؟
انا هاسيب ليكم التعليق ع الموقف دا ... مش راح اتكلم .
أقوله علي جنب بقي انا وصلت هنا يقولي علي جنب فين؟ اقوله اي جنب ... يعني اليمين ولا الشمال وقتها بقي فقدت اعصابي روحت صارخة فيه ... هي تقريبا كانت اقرب للزئير عن انها صرخة وبعلو صوتي " نزلني هنا يا سطي " .
أطلع بقي الكورس وإذ اتفاجئ ان الكورس اتأجل اسبوع ومحدش اتصل بيا عشان ال ايه رقمي وقع من عندهم ... انا كمان هنا هاسيب لحضرتكم الحرية في التعليق ع الموقف دا .
وأنا مروحة بقي ركبت ميكرو باص وإذ السواق عامل دماغ عبد الحليم علي أغنية " تاني تاني تاني ... رايح للحب تاني والنار والعذاب من تاني " المشكلة مش انه يعمل دماغ ويجبرنا إن احنا نسمع معاه الاغنية بتاعت حليم بالطريقة الشعبية بتاعته المشكلة انه اجبرنا علي سماع الاغنية بصوته هو شخصيا متخيلين ؟؟؟ ولما فتحت بوقي وقلت له "ونبي يا اسطي غني في سرك ... يا اما تقفل التسجيل وتغني انت لكن ما يبقاش انت والكاست مع بعض دماغنا وربنا ورمت " بكل برود شخر لي حضرته وقال بكل عنطزه وأنا علي نص الكبري وبخاف من المرتفعات " انزلي حضرتك من العربية " وفعلا نزلني يا جدعان وكان الراجل شهم رجع لي من الجنية وربع ... 75 قرش ... ولقيت نفسي في نص الكبري اروح فين واجي منين؟ وإذ أكتشف إن انا كنت في محطة مصر " انا اتجلبت يا سكينه " ال50 جنية الي في جيبي اتنشلت فين وامتي بقي " الله اعلم " ... بس الحمد لله ان انا كان جوه الشنطه بتاعتي 20 جنية وروحت ركبت تاكسي بس أبيض بقي ... وشوف الغباء بقي والاحراج ... كل واحد يوقف التاكسي ويلاقيني يقول سوري ... يقوم سواق التاكسي يعني بسم الله ما شاء الله يا أنسة انتي هضبه ومحدش شايفك قومت اعدت قدام ... وإذ في ناس كمان بيوقفوا التاكسي ... فا بصيت له بكل غل قائله " شوفت يا اسطي اهو مش مني " قالي اه الناس تقريبا اتعمت مش شايفين ان التاكسي أبيض وفيه زبون يا سبحان الله لما بيكون فاضي محدش بيشاورلي ولما بيكون معايا زباين الكل بيفتكرني ... وحزت في نفسيتي وفكرني بالي بيحصل ليا ... لما ببقي فاتحه الاميل ومستنيه أي حد من أصحابي يدخل او اعد أبص للموبايل واقوله رن ...ونبي رن ... بالله عليك يرن ... ولما ادخل انام او استحمي او اعمل حمام أو انشغل ... ( ميبطلش رن ).
هههههههههههههههههههههههههههههههههههههههههههههههههههههههههههههههههههههههههههههههه مسخرة بجد
ردحذفياعينى يابنتى كل دا حصل بعد ماقفلت معاكى!!!!!!! يلا ادينا طلعنا م اليوم المريب دا ببوست عسل
هههههههه شوفتي ازاي بقي
ردحذف